सोलापूर: महाराष्ट्राचे माजी उपमुख्यमंत्री तथा सोलापूर जिल्ह्यातील जेष्ठ राजकीय नेते विजयसिंह मोहिते -पाटील यांनी माजी आमदार राजन पाटील यांची त्यांच्या मोहोळ तालुक्यातील अनगर या गावातील मातोश्री या निवासस्थानावर जाऊन भेट घेतली आहे.
अकलूजचे धैर्यशील मोहिते – पाटील यांनी भाजपला सोडचिठ्ठी देत राष्ट्रवादीचे ज्येष्ठ नेते शरद पवार यांच्या गटातून माढा लोकसभेसाठी उमेदवारी दाखल केली आहे. त्यानंतर महाविकास आघाडीचे सर्व नेते एकत्र येऊन सोलापूर व माढा लोकसभा मतदारसंघासाठी ताकद लावण्याची घोषणा केली आहे. सोलापूर लोकसभा मतदारसंघात भाजपचे उमेदवार राम सातपुते यांच्यासाठी माजी आमदार राजन पाटील यांनी जोरदार बिल्डिंग लावली आहे. या पार्श्वभूमीवर विजयसिंह मोहिते- पाटील यांनी पाटील यांच्या निवासस्थानी जाऊन भेट घेतल्यामुळे राजकीय वर्तुळात चर्चेचा विषय झाला आहे. यावेळी पाटील परिवाराच्यावतीने त्यांचे स्वागत आणि यथोचित सन्मान करण्यात आला. यावेळी ज्येष्ठ नेते मोहिते- पाटील यांच्या प्रकृतीची विचारपूस माजी आमदार पाटील यांनी अत्यंत आपुलकीने केली. सहकार महर्षी स्व.शंकरराव मोहिते- पाटील आणि लोकनेते स्व.बाबुराव अण्णा पाटील या दोन ज्येष्ठ नेत्यांचे राजकीय आणि कौटुंबिक ऋणानुबंध संपूर्ण जिल्ह्याला सुपरीचीत आहेत. या भेटीमुळे आत्मिक ऋणानुबंधांना पुन्हा उजाळा मिळाल्याचे बोलले जात आहे.