आमच्या पक्ष नकली तर तुमच्या भाकड पक्षाचे काय?

सोलापूर: आमची शिवसेना नकली तर बाजूला सगळे भ्रष्टाचारी घेऊन बसलेल्या तुमच्या भाकड पक्षाचे काय? असे प्रत्युत्तर माजी मुख्यमंत्री उद्धव ठाकरे यांनी पंतप्रधान नरेंद्र मोदी यांनी सोमवारी केलेल्या आरोपाला उत्तर दिले आहे.

सोलापूर लोकसभेच्या महाविकास आघाडीच्या उमेदवार आमदार प्रणिती शिंदे यांच्या प्रचारार्थ कर्णिक नगर येथे आयोजित केलेल्या प्रचार सभेत माजी मुख्यमंत्री उद्धव ठाकरे यांनी मोदी यांचे आरोप खोडून काढले आहेत. याप्रसंगी माजी केंद्रीय गृहमंत्री सुशीलकुमार शिंदे, उमेदवार आमदार प्रणिती शिंदे उपस्थित होते. आमच्या शिवसेनेला तुम्ही नकली म्हणतात मग तुम्ही कोण आहात? तुला सर्व पक्षातील भ्रष्टाचारी मंडळी घेऊन बसला आहात. त्यामुळे तुमच्याकडे आता कमळ नव्हे तर फक्त मळ राहिला आहे. सन 2014 व 2019 च्या निवडणुकीमध्ये शिवसेना मित्र पक्ष म्हणून तुमच्या सोबत राहिली. त्यामुळे तुम्हाला पंतप्रधान पदावर बसता आले. पण मित्राच्या पाठीत कोणी खंजीर खुपसला? आता आम्ही तुम्हाला तुमची जागा दाखवून देऊ. मोदी यांना संविधान बदलायचेच आहे, शिवसेना संपवायची आहे.  त्यामुळे ते खोटे बोलत आहेत. पण त्यांनी हे लक्षात घ्यावे, मशाली आता पेटल्या आहेत. आम्हाला नकली म्हणणाऱ्या मोदी यांची उद्या धाराशिवमध्ये सभा आहे. सभेआधी त्यांनी तुळजाभवानीच्या मंदिरात जाऊन ‘जय भवानी” असे म्हणावे असे थेट आव्हान त्यांनी दिले. मराठा व धनगर आरक्षणाकडेही त्यांनी लक्ष वेधले. उप मुख्यमंत्री देवेंद्र फडणवीस यांच्यावरही त्यांनी टीका केली. टरबूजा म्हणून त्यांचा उल्लेख केला. सभेला लोकांची उत्स्फूर्त उपस्थिती होती.