अल्पसंख्यांक शाळांमध्ये हवे सभागृह : शिक्षणाधिकारी सचिन जगताप

सोलापूर : अल्पसंख्याक शाळांना सक्षम करण्यासाठी शाळांच्या आवारात सभागृह बांधावे, अशी सूचना माध्यमिक शिक्षणाधिकारी सचिन जगताप यांनी केली.
जैन अल्पसंख्यांक आर्थिक विकास महामंडळाचे अध्यक्ष तथा महाराष्ट्र राज्य अल्पसंख्यांक आयोगाचे सदस्य ललित गांधी यांच्या उपस्थितीत जिल्हाधिकारी कार्यालयातील नियोजन भवनात आयोजित गुणवंत विद्यार्थ्यांच्या पारितोषिक वितरण समारंभात ते बोलत होते. भगवान महावीरांच्या २५५० व्या निर्वाण कल्याणक महोत्सवानिमित्त ऑक्टोबर २०२४ मध्ये घेण्यात आलेल्या राज्यस्तरीय निबंध स्पर्धेत यश मिळवलेल्या आर्या आबा कोष्टी,  रामेश्वरी बाबुराव बंडगर व अन्य पुरस्कार प्राप्त विद्यार्थ्यांचा सन्मान करण्यात आला. याप्रसंगी माध्यमिक शिक्षणाधिकारी सचिन जगताप यांनी जैन अल्पसंख्यांक आर्थिक विकास महामंडळाचे अध्यक्ष ललित गांधी यांच्याशी अल्पसंख्यांक शाळांच्या विकासाबाबत चर्चा केली. अल्पसंख्यांक  शाळांमध्ये सुविधा निर्माण होण्यासाठी मदत करणे आवश्यक असल्याचे त्यांनी स्पष्ट केले.

जिल्हा नियोजन च्या सभागृहात ललित गांधी यांनी समाज बांधवांची बैठक घेतली. जैन अल्पसंख्यांक आर्थिक विकास महामंडळ म्हणजे नेमके काय व त्याचा उपयोग कशा कशासाठी होईल याबाबत त्यांनी सविस्तर चर्चा केली. महामंडळ स्थापन करण्यासाठी व जैन समाजाला अल्पसंख्यांक दर्जा प्राप्त करून देण्यासाठी केलेल्या संघर्षाचा त्यांनी उहापोह केला. त्याचबरोबर समाजबांधवांच्या अडचणी जाणून घेतल्या. सर्व समाज एकत्र झाल्याशिवाय उन्नती शक्य नसल्याचे त्यांनी स्पष्ट केले. व्यापारी बांधवांची ही बैठक घेऊन त्यांनी महामंडळाच्या योजनांचा आढावा घेतला. याप्रसंगी समाजबांधव केतन शहा, संतोष बंब, महावीर गांधी, कामिनी गांधी, राजकुमार शहा, प्रवीणा सोळंकी माया पाटील, श्याम पाटील आदी उपस्थित होते.