झेडपी आरोग्य कर्मचारी संघटनेच्या अध्यक्षाविरुद्ध आता तक्रार
सोलापूर : जिल्हा परिषद आरोग्य विभागातील कर्मचाऱ्याअंतर्गत सुरू असलेल्या तक्रारींचा सिलसिला थांबायचे नाव घेत नाही. आता चक्क जिल्हा परिषद आरोग्य कर्मचारी संघटनेचे जिल्हाध्यक्ष समीर शेख यांनी सोशल मीडियावर बदनामी केल्याची माजी महिला कर्मचाऱ्याने तक्रार केली आहे.
तक्रारदार महिलेने मुख्य कार्यकारी अधिकाऱ्यांच्या नावे दिलेल्या निवेदनात नमूद केले आहे की जिल्हा परिषद आरोग्य कर्मचारी संघटनेचे जिल्हाध्यक्ष समीर शेख यांनी नातेवाईकांकडून माझा मोबाईल नंबर घेतला व तुम्हाला आरोग्य विभागात नोकरी लावतो म्हणून बोलावून घेतले. झेडपीच्या आवारातील हॉटेलमध्ये माझे डॉक्युमेंट घेतले. वाय. पी. कांबळे यांच्यामुळे बदनामी झाली आहे, असे लिहून द्या. तो आता सेवानिवृत्त झाला आहे. त्यामुळे पन्नास लाख मिळाले आहेत. त्यातील वीस लाख मिळवून देतो, फक्त तुम्ही तक्रार द्या, मी तुम्हाला नोकरीला लावतो असे सांगून, माझा फोटो व सेल्फी काढला. नंतर हा फोटो व्हाट्सअप ग्रुपवर टाकून माझी बदनामी केली. यानंतर मला बरेच लोकांचे फोन आले. यानंतर खात्री केल्यावर समीर शेख यांनी जाणीवपूर्वक माझी व कुटुंबाची सोलापूर जिल्ह्यामध्ये बदनामी केली. यामुळे आता माझ्या मानसिक स्थितीवर परिणाम झाला आहे, असे त्या माजी महिला कर्मचाऱ्याने तक्रारीत नमूद केले आहे. त्यामुळे आरोग्य कर्मचारी संघटनेच्या जिल्हा अध्यक्षांच्या अडचणीत वाढ झाली आहे. विशेष म्हणजे यापूर्वी करमाळ्यातील कर्मचाऱ्यांनी डॉक्टरांविरुद्ध केलेली तक्रार अजून मिटलेली नाही. हा तिढा सुटत नसताना आणखी हे नवीन प्रकरण समोर आले आहे.
संघटनेचा वाद…
हा संघटनेचा वाद आहे. माजी अध्यक्ष व आमच्यात सध्या सोशल मीडियावरून बरेच आरोप- प्रत्यारोप होत आहेत. त्यातून ही तक्रार दिल्याचे मला समजले. प्रकरण मिटवण्यासाठी मला निरोप आला आहे. यावर आम्ही चर्चा करणार आहोत, अशी प्रतिक्रिया जिल्हाध्यक्ष समीर शेख यांनी दिली.
