गटशिक्षणाधिकारी आरबळे यांचा पदभार काढून चौकशीची मागणी
सोलापूर : पुणे विभागीय आयुक्तांच्या अधिकाराचा गैरवापर करत अक्कलकोट तालुक्यात मोठ्या प्रमाणात नियमबाह्य प्रतिनियुक्त्या केल्याची तक्रार मागासवर्गीय संघटना आणि सोलापूर जिल्हा प्राथमिक शिक्षक संघटना समन्वय समितीच्यावतीने केल्यानंतर जिल्हा परिषदेचे मुख्य कार्यकारी अधिकारी कुलदीप जंगम यांनी त्रिस्तरीय चौकशी समिती नेमली आहे. चौकशी समितीचे कामकाज सुरु असताना आरबळे यांचा पदभार काढावा, अशी मागणी मागासवर्गीय संघटनेचे तालुकाध्यक्ष महांतेश्वर कट्टीमनी यांनी प्रभारी मुख्य कार्यकारी अधिकारी संदीप कोहिनकर यांच्याकडे सोमवारी निवेदनाद्वारे केली आहे.
कट्टीमनी यांनी दिलेल्या निवेदनात अक्कलकोटचे प्रभारी गटशिक्षणाधिकारी आरबळे यांच्याविरुद्धच्या तक्रारारीचे स्वरूप आणि गांभीर्य पाहता ते आपल्या हाताखालील कर्मचाऱ्यांवर दबाब आणून पारदर्शक आणि निष्पक्षपाती चौकशीसाठी अडथळा ठरू शकतात.पारदर्शक आणि निष्पक्षपाती चौकशीसाठी वादग्रस्त प्रभारी गटशिक्षणाधिकारी आरबळे यांचा पदभार तातडीने काढून घेऊन चौकशी करणे उचित ठरणार आहे. प्रभारी गटशिक्षणाधिकारी आरबळे यांच्याविरुद्ध सातत्याने प्राप्त गंभीर स्वरूपाच्या तक्रारींमुळे चौकशी समितीची व्याप्ती वाढवून अन्यही गंभीर विषयांचा समावेश करण्याची मागणी यावेळी करण्यात आलेली आहे.तसेच दारिद्र्यरेषेखालील मागासवर्गीय मुलींचा भत्ता वाटप न करणे,अपात्र शाळेवर पात्र मुख्याध्यापक यांचे वेतन काढणे, नियमबाह्य समायोजन, समाज माध्यमांत शिक्षकांची प्रतिमा मलिन करणे,समानीकरण धोरणाची पायमल्ली, नियमबाह्य प्रभारी केंद्रप्रमुख नियुक्ती या व अन्य गंभीर तक्रारी पाहता केवळ अनियमित बदल्यांची चौकशी हे हिमनगाचे टोक असणार असल्याची माहिती तालुकाध्यक्ष महांतेश्वर कट्टीमनी यांनी दिली.
काय आहे तक्रार…
प्रभारी गटशिक्षणाधिकारी परमेश्वर आरबळे यांनी अक्कलकोट तालुक्यातील 21 शिक्षकांच्या नियमबाह्य बदल्या केल्या. या बदल्या करताना तालुका गटविकास अधिकाऱ्यांकडे टिप्पणी ठेवली. या प्रतिनियुक्त्या करताना विभागीय आयुक्तांचा अधिकार वापरल्याने त्यांच्याविरुद्ध तक्रार करण्यात आली. तक्रारी झाल्यानंतर गटविकास अधिकाऱ्यांना अंधारात ठेवून या बदल्या परस्पर रद्द केल्या.
सुलभा वठारे करणार चौकशी
विभागीय आयुक्तांनी चौकशीचे आदेश दिल्यानंतर मुख्य कार्यकारी अधिकारी कुलदीप जंगम यांनी योजना शिक्षणाधिकारी सुलभा वठारे यांच्या अध्यक्षतेखाली उपशिक्षणाधिकारी रुपाली भावसार, विस्तार अधिकारी हरीष राऊत यांची त्रीसदशीय समिती नेमली आहे. 27 डिसेंबरपासून ही समिती आरबळे यांच्या चौकशीला सुरुवात करणार आहे.
