सोलापूर : सध्या महाराष्ट्र शासनातर्फे वरिष्ठ अधिकाऱ्यांच्या प्रशासकीय बदल्यांचे सत्र सुरू आहे. कोणाच्या बदल्या कोठे होतील याचा नेम सांगणे कठीण झाले आहे. गेल्या आठवड्यात गडचिरोलीला बदली झालेले विठ्ठल ढेपे यांची सोलापूरच्या माध्यमिक शिक्षण विभागात उपशिक्षणाधिकारी म्हणून सहा जून रोजी नियुक्ती झाली आहे.
सोलापूर माध्यमिक शिक्षण विभागात अनेक जागा रिक्त आहेत. या विभागाला एक वर्षानंतर अधीक्षक मिळाला आहे. आता विठ्ठल ढेपे यांची उप शिक्षणाधिकारी म्हणून नियुक्ती झाली आहे. महाराष्ट्र शासनाच्या शालेय शिक्षण विभागाने सेवा ब गट मधील अधिकाऱ्यांच्या 31 मे रोजी बदल्या केल्या होत्या. या बदल्यामध्ये ढेपे यांची गडचिरोलीला बदली झाली होती. सहा जून रोजी शिक्षण विभागाने पुन्हा बदल आदेश काढत ढेपे यांची सोलापूरला नियुक्ती केली आहे. आठवडाभरात झालेल्या या चमत्काराबाबत आश्चर्य व्यक्त केले जात आहे. ढेपे यांनी सोलापूरला यापूर्वी वेतन पथकात काम केले आहे.
