सोलापुरात रेशन दुकानाला 85 हजाराचा दंड व परवाना निलंबित

सोलापूर : राज्य अन्न आयोग अध्यक्षांच्या दौऱ्यावेळी त्यांच्याकडे वादग्रस्त रास्त भाव धान्य दुकानाबाबतीत आलेल्या तक्रारीवरून अन्नधान्य वितरण अधिकारी ओंकार पडोळे यांच्या मार्गदर्शनाखाली परिमंडळ अधिकाऱ्यांनी परिमंडळ ब विभागातील ११ दुकानाची अचानक तपासणी केली होती. त्यात विडी घरकुल येथील दुकानाला 85 हजाराचा दंड व सहा महिन्यासाठी परवाना निलंबित करण्यात आला आहे.

परिमंडळ पथकाने तपासणी केलेल्या ११ दुकानापैकी जुना घरकुल जवळील गांधीनगर येथील साधना सर्व ग्राहक व्यवसाय संस्था ब-34 या दुकानात पुढीलप्रमाणे दोष आढळून आले. दुकानात जागा अपुरी असणे, दुकानात दर्शनी भागात बोर्ड नसणे,दप्तर अद्यावत नसणे, तसेच गहू ९. ५६ व तांदूळ १४.३५ इतके धान्य तफावत आढळल्याने शासकीय दराप्रमाणे धान्याची होणारी ८५ हजार ५५४ रुपये इतक्या किंमतीचा दंड आकारण्यात आला असून त्याशिवाय त्या रास्त भाव धान्य दुकानाचा परवाना तात्पुरत्या स्वरूपात सहा महिन्याकरिता निलंबन करण्यात आले आहे.

राज्य शासनाच्यावतीने गोरगरीब महिलांना वाटप करण्यात येणाऱ्या मोफत साड्यांचे परस्पर विल्हेवाट लावण्याचे सावळा गोंधळ परिमंडळ विभागात घडत असल्याचे माध्यमातून  झळकताच अन्नधान्य वितरण अधिकारी ओंकार पडोळे यांनी ॲक्शन मोडवर येत भरारी पथकाची नेमणूक केली.  गुरुवारी या भरारी पथकाचे प्रमुख परिमंडळ अधिकारी नंदकिशोर डोके व पुरवठा निरीक्षक राजेश यमपुरे यांनी दिवसभरात एकूण सहा दुकानाची तपासणी केली असून एकंदरीत परिमंडळ अ विभागात ६१ दुकाने आहेत. लवकरच इतर सर्वच दुकानदारांची काटेकोरपणे तपासणी करण्यात येणार असून दोषी दुकानावर कारवाई करणार असल्याचे अन्नधान्य वितरण अधिकारी ओंकार पडोळे यांनी कळविले आहे. रेशन दुकानात अचानक आलेल्या भरारी पथकाला पाहून दुकानदारांचे चांगलेच धाबे दणाणले आहे.

मागील दोन महिन्यात अवैधरित्या घरगुती गॅस भरणाऱ्या पॉईंटवर भरारी पथकामार्फत धाड टाकून कारवाई करण्यात आली आहे. पुरवठा क्षेत्रात शासकीय योजनाची मोहीम प्रभावीपणे राबवित, दोषी रास्त भाव धान्य दुकान व अवैध्यरित्या गॅस पॉइंटवर बेधडक कारवाई करणाऱ्या अन्नधान्य वितरण अधिकारी आता परिमंडळ अ विभागात सावळा गोंधळ घालणाऱ्या रास्त भाव धान्य दुकानावर कारवाई करणार का? असा सवाल नागरिकातून उपस्थित केला जात आहे.