बेकायदेशीर कामासाठी शिक्षिकेचा दबाव; माध्यमिक शिक्षण अधिकाऱ्याची पोलिसात धाव
सोलापूर ; बेकायदेशीर काम करून घेण्यासाठी माध्यमिक शिक्षणाधिकाऱ्यांवर दबाव टाकत कार्यालयात गोंधळ घातल्याप्रकरणी शिक्षिकेच्या विरोधात माध्यमिक शिक्षणाधिकारी सचिन जगताप यांनी पोलिसात धाव घेतली आहे.
जिल्हा परिषदेतील माध्यमिक शिक्षण कार्यालयात शिक्षणाधिकारी सचिन जगताप हे सोमवारी कामकाज करीत असताना एका संस्थेत काम करणारी शिक्षिका कार्यालयात आली. तिने माझा मागील पगार काढून द्या म्हणून शिक्षणाधिकाऱ्यांवर दबाव टाकण्यास सुरुवात केली. शिक्षणाधिकाऱ्यांनी तिची समजूत घातल्यानंतरही माझे काम कसे होत नाही म्हणून तिने अर्वाच्य भाषेत शिवीगाळ करून मोबाईल आपटला. त्यामुळे शिक्षणाधिकारी जगताप यांनी सदर बझार पोलिसांना फोन केला. त्यामुळे जिल्हा परिषदेत पोलीस आले व त्यांनी त्या शिक्षिकेला ताब्यात घेतले. पोलीस ठाण्याकडे नेत असताना प्रसार माध्यमांना दिलेल्या प्रतिक्रियांमध्ये शिक्षणाधिकारी जगताप यांच्यावर तिने गंभीर आरोप केले. बेकायदेशीर काम करून घेण्यासाठी अशा पद्धतीने बेछूट आरोप करणाऱ्या त्या शिक्षिकेवर कारवाई करण्याचे आदेश जिल्हा परिषदेचे मुख्य कार्यकारी अधिकारी कुशल जैन यांनी दिले. त्यामुळे शिक्षणाधिकारी जगताप यांनी सदर बझार पोलीस ठाण्यात धाव घेतली. बेकायदेशीर काम करून घेण्यासाठी दबाव टाकून सरकारी कामात अडथळा आणणे, बेछूट आरोप करून बदनामी करणे अशा प्रकारची सविस्तर फिर्याद जगताप यांनी सदर बझार पोलीस ठाण्यात दाखल केल्याचे सांगण्यात आले. याबाबत रात्री उशिरापर्यंत गुन्हा दाखल झाला नव्हता.
सदर शिक्षिकेने यापूर्वीही अशाच पद्धतीने माध्यमिक शिक्षण कार्यालयात गोंधळ घालून बेछूट आरोप केले होते. त्यानंतर संस्थेत रुजू झाल्यापासूनचा मागील काळातील पगार द्यावा यासाठी तिने तगादा लावला होता. पण असे वेतन काढता येणार नाही असे सांगूनही हे बेकायदेशीर काम करून घेण्यासाठी तिने सोमवारी पुन्हा माध्यमिक शिक्षण कार्यालयात धाव घेतली व गोंधळ घातला. पण शिक्षणाधिकारी जगताप यांनी आतापर्यंत अशा अनेक बेकायदेशीर कामांना चाप लावल्यामुळे त्यांनी हे काम होणार नाही, असे स्पष्ट सांगितल्यानंतर तिने गोंधळ घातला. या प्रकरणाचा पुढील तपास पोलीस करीत आहेत..
