निम्बर्गी, बंकलगीच्या जलजीवनचे टेंडर ठप्प

सोलापूर : जिल्हा परिषदेच्या मुख्य कार्यकारी अधिकारी मनीषा आव्हाळे यांनी जलजीवनच्या कामाला गती दिलेली असतानाच दक्षिण सोलापूर तालुक्यातील निम्बर्गी व बंकलगीच्या जलजीवनच्या टेंडरला टाळाटाळ केली जात असल्याचे समोर आले आहे.

जिल्ह्यात केंद्र शासनाच्या जलजीवन मिशन योजनेतून 855 कामांना मंजुरी देण्यात आली आहे.  यातील 83 कामे पूर्ण झाल्याचे सांगण्यात आले आहे तर 54 कामे गावातील वादामुळे अद्याप सुरू झालीच नसल्याची माहिती समोर आली आहे. गावातील सरपंच व सदस्यांमध्ये एकमत नसल्याने अडचणी निर्माण झाल्याचे प्रशासनातर्फे सांगण्यात आले आहे.  पण दक्षिण सोलापूर तालुक्यातील निम्बर्गी व बंकलगी ग्रामपंचायतने जलजीवनच्या कामासाठी आवश्यक ती सर्व प्रक्रिया पूर्ण केलेली आहे. हे काम सुरू होण्यासाठी जिल्हा परिषदेच्या ग्रामीण पाणीपुरवठा विभागाने टेंडर जारी करावे असा प्रस्ताव सादर केलेला आहे. याबाबत वारंवार पाठपुरावा करूनही जलजीवन मिशनच्या कामासाठी सुरू केलेल्या  कक्षाने अद्याप टेंडर फ्लॅश केलेले नाही. याबाबत स्थानिक पातळीवर पाठपुरावा होऊनसुद्धा दुर्लक्ष केले जात असल्याच्या तक्रारी आहेत. डिसेंबरपर्यंत जलजीवनची कामे पूर्ण होणे अपेक्षित आहे. पण आता केवळ पंधरा दिवस शिल्लक राहिलेले असताना या दोन गावाचे टेंडरही निघालेले नसल्याने ही कामे पूर्ण कधी होणार ? असा सवाल उपस्थित केला जात आहे.