सोलापूर : महायुतीचे उमेदवार आमदार विजयकुमार देशमुख यांच्या प्रचारार्थ आंध्रप्रदेशचे उपमुख्यमंत्री तथा पावर स्टार पवन कल्याण यांचे हैदराबाद रोडवरील विडी घरकुल मध्ये आगमन झाले असून त्यांना पाहण्यासाठी चाहत्यांची रस्त्याच्या दुतर्फा प्रचंड गर्दी झाली आहे.
उपमुख्यमंत्री, पावर स्टार पवन कल्याण यांचे विडी घरकुल मध्ये रथावर आगमन होताच आमदार विजयकुमार देशमुख यांनी त्यांचे हार घालून स्वागत केले. सुपरस्टार हिरो पवन कल्याण यांना पाहण्यासाठी चाहत्यानी प्रचंड गर्दी केली आहे. पवन कल्याण यांची छबी आपल्या मोबाईलमध्ये टिपण्यासाठी अनेकांचे हात उंचावल्याचे चित्र पहावयास मिळाले. तसेच आजूबाजूला थांबलेल्या प्रेक्षकांनी त्यांच्यावर फुलांची उधळण केली आहे. पावर स्टार पवन कल्याण यांच्या या रॅलीमुळे विडी घरकुल भाजपमय होऊन गेल्याचे चित्र दिसून आले.
जेसीबीने केली फुलांची उधळण
देवेंद्र कोठे यांच्यासाठी आवाहन
आंध्र प्रदेशचे उपमुख्यमंत्री आणि पॉवरस्टार म्हणून ओळखले जाणारे सिनेअभिनेते पवन कल्याण यांनी शनिवारी रोड शो करीत भाजपा आणि महायुतीचे शहर मध्य मतदारसंघाचे उमेदवार देवेंद्र कोठे यांना निवडून देण्याचे आवाहन केले. सुमारे ५ किमी अंतरावर रस्त्याच्या दुतर्फा जमलेल्या सोलापूरकरांची मने पवन कल्याण यांनी जिंकली. अक्कलकोट रोड येथील पाणी टाकीजवळ सिने अभिनेते पवन कल्याण यांचे आगमन होताच उघड्या जीपमध्ये उभे राहिलेल्या अभिनेते पवन कल्याण आणि भाजपा महायुतीचे उमेदवार देवेंद्र कोठे यांचे नागरिकांनी फटाक्यांची आतिषबाजी करत जेसीबीने फुले उधळून त्यांचे भव्य स्वागत केले. जीपमध्ये उभे राहून त्यांनी नागरिकांना देवेंद्र कोठे यांना मतदान करण्याचे आवाहन केले. नागरिकांनीही त्यांच्या आवाहनाला जोरदार प्रतिसाद देत भाजपा आणि महायुतीचे उमेदवार देवेंद्र कोठे यांच्याच पाठीशी खंबीरपणे उभे राहण्याचा निर्धार व्यक्त केला.जय श्रीराम, भारतमाता की जय, वंदे मातरम, जय मार्कंडेया अशा घोषणांनी सर्व रस्ते दुमदुमून गेले होते.
