सोलापूर : सर्वोच्च न्यायालयाच्या आदेशाप्रमाणे जिल्हा परिषद व पंचायत समितीच्या निवडणुका चार महिन्यात घेण्यात येणार असल्याने सर्व जिल्हाधिकाऱ्यांनी झेडपी व पंचायत समितीच्या सदस्य व प्रभाग रचना निश्चित करण्याचा कार्यक्रम जाहीर करावा, असे आदेश महाराष्ट्र शासनाचे उपसचिव व्ही एम भरोसे यांनी गुरुवार दि. 12 रोजी दिले आहेत. त्यामुळे भावी झेडपी मेंबरनो. लागा कामाला, आता वेळ कमी आहे.
सर्वोच्च न्यायालयाने सहा मे रोजी स्थानिक स्वराज्य संस्थांच्या निवडणुकांबाबत आदेश पारित केला आहे. या आदेशानुसार राज्याच्या सहसचिवांनी राज्यातील 32 जिल्हा परिषद व 336 पंचायत समितीच्या सदस्य संख्या व प्रभाग रचना करण्यासंदर्भात आदेश पारित केले आहेत. संबंधित जिल्हाधिकाऱ्यांनी जिल्हा परिषद निवडणूक विभाग व पंचायत समिती निर्वाचक गण सदस्य संख्या व प्रभाग रचना करण्यासंदर्भात अधिसूचना जारी करावी. प्रभाग रचना करण्यासंदर्भात अधिकारांचे आदेश काढावेत व प्रभाग रचना कार्यक्रम व वेळापत्रक जाहीर करावे असे या आदेशात नमूद करण्यात आले आहे. या आदेशानुसार सोलापूर जिल्हाधिकारी कार्यालयातील निवडणूक शाखेतर्फे जिल्हा परिषद व पंचायत समिती सदस्य संख्या व प्रभाग रचना करण्याचा कार्यक्रम लवकरच जाहीर होणार आहे. त्यामुळे जिल्हा परिषद व पंचायत समिती मेंबर होऊ इच्छिणाऱ्यांना आता परीक्षा देण्याची वेळ आली आहे. सर्व पक्षाचे पदाधिकारीही स्थानिक स्वराज्य संस्थांच्या निवडणुका यशस्वी करण्यासाठी जोरदार तयारी करताना दिसत आहेत. झेडपी व पंचायत समितीच्या निवडणुका कशा होणार याकडे सर्वांचे लक्ष लागले होते. काही राजकीय मंडळी जुन्याच प्रभाग रचनेनुसार या निवडणुका होतील असा अंदाज बांधीत होते. पण आता या आदेशानुसार जिल्हा परिषद व पंचायत समितीच्या मतदारसंघाची पुनर्रचना होणार आहे हे स्पष्ट झाले आहे. मतदार संघ वाढणार की कमी होणार हे लवकरच स्पष्ट होणार आहे.
More Stories
ग्रामीण भागातील गरोदर महिलांना मोफत सोनोग्राफी सुविधा
मंगळवेढा न्यायालयाने विनयभंगाच्या गुन्ह्यात सुनावली आरोपीस तीन वर्षे सक्तमजुरी
सोलापुरात हिरकणी बसची ट्रकला धडक चालकासह महिला प्रवासी ठार